शिवसेनेचे आमदार चंद्रकांत पाटील यांनी खडसेंवर आरोप करताना असा सवाल केला की, ‘‘एकनाथ खडसे यांच्या नावावर आधी ४० एकर शेती होती, ती अचानक १०० एकर कशी झाली?’’ त्यांनी यावर पुरावे असल्याचेही म्हटले. इतकेच नव्हे, तर कुरुंदकर नावाच्या पोलिस अधिकाऱ्याच्या प्रगतीविषयी प्रश्न उपस्थित करत ‘‘अशा गुन्हेगारी प्रवृत्तीच्या व्यक्तींच्या मागे कोणाचा आशीर्वाद होता?’’ असा टोला त्यांनी लगावला.
या आरोपांवर खडसे यांनी जोरदार प्रत्युत्तर दिले. त्यांनी स्पष्ट केले की, ‘‘माझ्या नावावर ४० एकर शेती आहे, पण कुटुंब आणि भावाच्या नावावरची शेती धरली तर आमच्याकडे १२० एकर जमीन आहे. मी ७ वर्षांचा होतो, तेव्हापासून ही मालमत्ता आहे. चंद्रकांत पाटील यांनी आरोप करण्याआधी अभ्यास करायला हवा होता.’’
त्याचवेळी खडसे यांनीही चंद्रकांत पाटील यांच्या आर्थिक प्रगतीवर प्रश्न उपस्थित केला. ‘‘ते एका पोलिस हवालदाराचे पुत्र आहेत, मग त्यांच्या मालकीची एवढी संपत्ती कुठून आली? ५० खोके एकदम ओके म्हणणाऱ्यांच्या यादीत त्यांचे नाव असेल काय?’’ असा खोचक सवाल करत त्यांनी पलटवार केला.
खडसे यांचे आरोप यावरच थांबले नाहीत. त्यांनी पाटील यांच्यावर थेट गुन्हेगारी पार्श्वभूमी असल्याचा आरोप केला. ‘‘कुरुंदकर आमच्या भागात पोलिस निरीक्षक होते. त्यावेळी चंद्रकांत पाटील यांच्यावर तडीपारी आणि ३०७ सारखे गंभीर गुन्हे दाखल होते. त्यावेळी माझ्या मुलाने मध्यस्थी करून त्यांना सोडवलं. ही मंडळी गुन्हेगारी प्रवृत्तीची आहेत,’’ असेही खडसे म्हणाले.
गिरीश महाजन आणि एकनाथ खडसे यांच्यातील राजकीय वैर पूर्वीपासूनच सर्वश्रुत आहे. मात्र आता या संघर्षात चंद्रकांत पाटीलही उतरले असून, शिवसेना आणि राष्ट्रवादीमध्ये यामुळे नव्या वादाची ठिणगी पडली आहे.
ही सगळी घडामोड एकप्रकारे आगामी निवडणुकीसाठी तयारी असल्याचे स्पष्ट संकेत देते. आरोप-प्रत्यारोपांच्या माध्यमातून दोन्ही बाजूंनी जनतेच्या मनात शंका आणि द्वेष पेरण्याचा प्रयत्न सुरू आहे. हे राजकीय नाट्य केवळ संपत्तीपर्यंत मर्यादित राहते की यातून आणखी काही गंभीर बाबी उघड होतात, हे पाहणे महत्त्वाचे ठरेल.
.png)
.png)
.png)
0 टिप्पण्या