चिमुकली नंदिनीचा अल्पशा आजाराने मृत्यू; साकळी गावात हळहळ

साकळी (ता. यावल) | प्रतिनिधी : साकळी गावावर दुःखाचे सावट पसरले आहे. वयाच्या केवळ १२ व्या वर्षी नंदिनी लखीचंद निळे या चिमुकलीने जगाचा निरोप घेतला. ८ नोव्हेंबर रोजी अल्पशा आजाराने तिचे निधन झाले आणि क्षणभरातच साकळी गाव शोकसागरात बुडाले.

नंदिनी ही इयत्ता सहावीमध्ये शिक्षण घेत होती. अभ्यासू, हसतमुख आणि निरागस स्वभावामुळे ती शाळेतील शिक्षक, मैत्रिणी आणि शेजाऱ्यांची लाडकी होती. तिच्या गोड हसण्याने घर आणि शाळा उजळून निघायची. पण अचानक प्रकृती खालावल्याने सुरू असलेल्या उपचारादरम्यान तिची प्राणज्योत मालवली आणि संपूर्ण कुटुंब अंधारात बुडाले.

घरात सर्वत्र मौन पसरले आहे. आई-वडील, भाऊ-बहीण, काका-काकू आणि नातेवाईक अश्रूंनी व्यथित झाले आहेत. गावातील लोक म्हणतात — “घरातील हसूच थांबलेय… एवढ्या लहान वयात देवाने तिची बोलावणी करू नये होती.”

नंदिनीच्या निधनाची वार्ता कळताच शाळेतील शिक्षक आणि सहाध्यायींनी अश्रू ढाळत श्रद्धांजली अर्पण केली. घराबाहेर शोकमग्न वातावरण पाहायला मिळाले, तर संपूर्ण गावात हळहळ व्यक्त केली जात आहे.

या निष्पाप चिमुकलीला साकळी येथील स्मशानभूमीत गावकऱ्यांच्या उपस्थितीत शोकाकुल वातावरणात अंत्यसंस्कार करण्यात आले. तिच्या जाण्याने साकळी गावाने आपला एक गोड, निरागस हसू कायमचे गमावले.

दैवदुर्विलासापुढे मानवी हात लहान पडतात, तरीही ईश्वर या दुःखातून नंदिनीच्या परिवाराला सावरण्याची शक्ती देवो, हीच सर्वांची प्रार्थना.

🕊️ भावपूर्ण श्रद्धांजली 🙏

“नंदिनी... तुझ्या गोड हसण्याने सगळ्यांची मने जिंकलीस,
देवदूतासारख्या तुझ्या निरागस चेहऱ्याची आठवण कायम आमच्यासोबत राहील.”