यावल पंचायत समिती कार्यालयातील कारभारावर प्रश्नचिन्ह निर्माण करणारी घटना समोर आली असून, यावल-रावेर मतदारसंघाचे आमदार अमोल जावळे यांनी पंचायत समिती कार्यालयाला अचानक भेट दिल्यानंतर प्रशासनाची मोठी पोलखोल झाली आहे.
आमदारांनी व्यक्त केली तीव्र नाराजी
कार्यालयात बीडीओसह अनेक कर्मचारी अनुपस्थित असल्याचे पाहून आमदार अमोल जावळे यांनी तीव्र नाराजी व्यक्त केली. जनतेच्या कामासाठी चालणाऱ्या पंचायत समितीमध्ये अधिकारीच वेळेवर उपस्थित राहत नसतील, तर ग्रामीण भागातील नागरिकांच्या समस्या सुटणार कशा? असा सवाल आमदारांनी उपस्थित केला.
जिल्हा परिषद सीईओंकडे थेट तक्रार
या प्रकरणाची गंभीर दखल घेत आमदार जावळे यांनी थेट जिल्हा परिषद मुख्य कार्यकारी अधिकारी (सीईओ) यांच्याकडे तक्रार केली असून, संबंधित अधिकारी व कर्मचाऱ्यांवर शिस्तभंगाची कारवाई करण्याची मागणी केली आहे.
ग्रामसेवक नियुक्तीची मागणीही केली
यावेळी पंचायत समितीच्या बैठकीत ग्रामसेवक नियुक्तीबाबत देखील चर्चा झाली. काही ग्रामपंचायतींमध्ये ग्रामसेवकांची कमतरता असून त्यामुळे विकासकामांवर परिणाम होत असल्याचे आमदारांनी नमूद केले.
प्रशासनात खळबळ
आमदारांच्या अचानक भेटीमुळे पंचायत समितीतील प्रशासनात एकच खळबळ उडाली असून, अधिकारी-कर्मचाऱ्यांच्या उपस्थितीबाबत आता चौकशी आणि कारवाई होण्याची शक्यता व्यक्त केली जात आहे.
कारवाई होणार का? नागरिकांचे लक्ष
यावल तालुक्यातील ग्रामीण भागातील नागरिकांच्या विविध कामांसाठी पंचायत समिती महत्त्वाची संस्था आहे. मात्र कार्यालयात अधिकारीच गैरहजर राहात असल्याने जनतेच्या प्रश्नांना कोण उत्तर देणार? असा सवाल नागरिकांकडून उपस्थित केला जात आहे.
जाहिरात आणि बातम्यांसाठी संपर्क - 7774943264
.png)
0 टिप्पण्या