जळगाव शहरातील रेल्वे स्थानक परिसरात मोबाईल चार्जिंगच्या किरकोळ कारणावरून झालेल्या वादात तरुणाला मारहाण झाल्याची घटना घडली आहे. या प्रकरणी शहर पोलीस ठाण्यात दोन जणांविरोधात गुन्हा दाखल करण्यात आला आहे. सदर प्रकार शनिवारी (दि. ११ मे) रोजी घडला असून, परिसरात खळबळ उडाली आहे.
विशाल मोरे (वय ३०, रा. गेंदालाल मिल, जळगाव) यांनी शहर पोलिस ठाण्यात दिलेल्या फिर्यादीनुसार, त्यांचा मुलगा रेल्वे स्थानकाजवळील पानटपरीवर मोबाईल चार्जिंगसाठी गेला होता. यावेळी तिथे उपस्थित रमेश पाटील यांनी “तू चोर आहेस” असे म्हणत त्याला संशयित नजरेने पाहिले व अपमानकारक शब्द वापरले.
यावरून मोठा वाद निर्माण झाला. विशाल मोरे याने याबाबत जाब विचारताच रमेश पाटील आणि त्याचा साथीदार राहुल पाटील यांनी शिवीगाळ करत त्याला मारहाण केली. शिवाय हातात असलेला भजे तळण्याचा झारा (लोखंडी झारा) त्याच्या डोक्यात मारून गंभीर दुखापत केली.
ही धक्कादायक घटना घडत असताना परिसरात काही वेळ तणावाचे वातावरण निर्माण झाले होते. जखमी विशाल मोरे याला तातडीने शासकीय वैद्यकीय रुग्णालयात दाखल करण्यात आले असून त्याच्यावर उपचार सुरू आहेत.
शहर पोलीस ठाण्याचे अधिकारी तपास करीत असून, आरोपी रमेश पाटील व राहुल पाटील यांच्याविरोधात गुन्हा नोंदवण्यात आला आहे. आरोपींना लवकरच अटक करण्यात येईल, असे पोलिसांनी सांगितले आहे. मोबाईल चार्जिंगसारख्या किरकोळ कारणावरून झालेल्या या प्रकारामुळे स्थानिकांमध्ये संतापाचे वातावरण आहे.
0 टिप्पण्या