जळगाव | Jalgaon News महाराष्ट्राच्या राजकारणात पुन्हा एकदा मोठी खळबळ उडाली आहे. भाजपाचे उत्तर महाराष्ट्र संयोजक विजय चौधरी आणि राज्याचे मंत्री गिरीश महाजन यांच्यातील कथित ऑडिओ क्लिप सोशल मीडियावर मोठ्या प्रमाणात व्हायरल होत असल्याचा दावा केला जात आहे. या क्लिपमध्ये केंद्रीय राज्यमंत्री रक्षा खडसे यांच्या मंत्रिपदाबाबत चर्चा झाल्याचा आणि त्यांच्या राजीनाम्याची मागणी करण्यात आल्याचा दावा सोशल मीडियावर केला जात आहे.



कथित ऑडिओमध्ये विजय चौधरी हे, "एकनाथ खडसे आणि त्यांच्या कुटुंबाकडून भाजपवर सातत्याने टीका होत असेल, तर रक्षा खडसे यांना मंत्रिमंडळात का ठेवले आहे?" असा प्रश्न उपस्थित करत असल्याचे ऐकू येत असल्याचा दावा केला जात आहे. त्यावर मंत्री गिरीश महाजन यांनीही प्रतिसाद दिल्याचे बोलले जात आहे. मात्र, या संभाषणाची स्वतंत्रपणे पुष्टी झालेली नाही.

या कथित क्लिपमध्ये एकनाथ खडसे आणि त्यांच्या कुटुंबीयांबाबत आक्षेपार्ह भाषा वापरण्यात आल्याचाही आरोप सोशल मीडियावर केला जात आहे. त्यामुळे उत्तर महाराष्ट्रातील राजकीय वातावरण पुन्हा तापले असून, भाजपमधील अंतर्गत मतभेदांबाबत चर्चांना उधाण आले आहे.

दरम्यान, या कथित ऑडिओ क्लिपच्या सत्यतेबाबत संबंधित नेते, भाजप किंवा कोणत्याही अधिकृत यंत्रणेकडून अद्याप दुजोरा मिळालेला नाही. त्यामुळे या क्लिपमधील दाव्यांची स्वतंत्रपणे पुष्टी झालेली नाही आणि ती सत्य असल्याचे मानता येणार नाही. व्हायरल ऑडिओबाबत संबंधित पक्षांची अधिकृत भूमिका येणे बाकी आहे.

राजकीय वर्तुळासह संपूर्ण राज्याचे लक्ष आता या प्रकरणाकडे लागले असून, संबंधित नेत्यांकडून स्पष्टीकरण किंवा प्रतिक्रिया येते का, याकडे सर्वांचे लक्ष आहे.