जळगाव | प्रतिनिधी : राज्याचे ग्रामविकास व पंचायतराज मंत्री गिरीश महाजन यांच्या एका तरुणीसोबतचे कथित फोटो सोशल मीडियावर व्हायरल झाल्यानंतर या प्रकरणाला नवे वळण मिळाले आहे. हे फोटो कृत्रिम बुद्धिमत्ता (AI) तंत्रज्ञानाचा वापर करून मॉर्फ करण्यात आल्याचा आरोप करण्यात आला असून, या प्रकरणी जळगाव सायबर पोलिस ठाण्यात गुन्हा दाखल करण्यात आला आहे.
जळगावचे नगरसेवक अरविंद भगवान देशमुख यांनी याप्रकरणी सायबर पोलिसांकडे तक्रार दाखल केली. तक्रारीनुसार, भरत मस्के नावाच्या फेसबुक युजरने गिरीश महाजन यांचे छायाचित्र AI च्या मदतीने मॉर्फ करून त्यासोबत आक्षेपार्ह आणि बदनामीकारक मजकूर सोशल मीडियावर प्रसारित केला.
या तक्रारीच्या आधारे सायबर पोलिसांनी भारतीय न्याय संहिता (BNS) कलम 356, 3(5) तसेच माहिती तंत्रज्ञान कायदा कलम 66(C) आणि 67 अंतर्गत गुन्हा नोंदवून तपास सुरू केला आहे.
'मूळ फोटो क्रॉप करून दिशाभूल' : गिरीश महाजन
या प्रकरणावर स्वतः गिरीश महाजन यांनीही प्रतिक्रिया देत सोशल मीडियावर व्हायरल होत असलेले फोटो दिशाभूल करण्याच्या उद्देशाने मॉर्फ करण्यात आल्याचा दावा केला. त्यांनी सांगितले की, मूळ छायाचित्रात अनेक व्यक्ती उपस्थित होत्या. मात्र, जाणीवपूर्वक इतर व्यक्तींना फोटोमधून क्रॉप करून केवळ दोन जण सेल्फी घेत असल्याचा आभास निर्माण करण्यात आला.
महाजन यांनी या प्रकरणाचा सखोल तपास व्हावा यासाठी मुंबईतही स्वतंत्र तक्रार दाखल केल्याची माहिती दिली असून, दोषींवर कठोर कारवाई करण्याची मागणी केली आहे.
AI मॉर्फिंग म्हणजे काय?
एखाद्या व्यक्तीचे छायाचित्र कृत्रिम बुद्धिमत्ता किंवा इतर डिजिटल साधनांच्या मदतीने बदलणे, त्यात फेरफार करणे किंवा चुकीच्या संदर्भात वापरून सोशल मीडियावर प्रसारित करणे याला फोटो मॉर्फिंग म्हणतात. अशा प्रकारातून व्यक्तीची बदनामी होऊ शकते आणि तो गंभीर सायबर गुन्हा मानला जातो.
कायदेशीर कारवाईची तरतूद
सायबर तज्ज्ञांच्या मते, AI किंवा डिजिटल तंत्रज्ञानाच्या मदतीने फोटो मॉर्फ करून बदनामीकारक अथवा आक्षेपार्ह मजकूर प्रसारित करणे हा कायद्याने दंडनीय गुन्हा आहे. अशा प्रकरणांमध्ये माहिती तंत्रज्ञान कायद्यातील कलम 66(C) आणि 67 तसेच भारतीय न्याय संहितेतील संबंधित कलमांनुसार कारवाई होऊ शकते.
दरम्यान, या प्रकरणामुळे सोशल मीडियावर AI तंत्रज्ञानाच्या गैरवापराबाबत पुन्हा एकदा चिंता व्यक्त केली जात असून, जळगाव सायबर पोलिसांकडून डिजिटल पुरावे आणि संबंधित सोशल मीडिया खात्यांचा तपास सुरू आहे.
0 टिप्पण्या