मुंबई/नाशिक | प्रतिनिधी नाशिक स्थानिक स्वराज्य संस्था मतदारसंघाच्या विधानपरिषद निवडणुकीत विजयी ठरल्यानंतर गोकुळ गीते यांच्या पुढील राजकीय वाटचालीबाबत मोठी चर्चा सुरू झाली आहे. विजयाच्या दिवशीच ते मुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करणार असल्याची जोरदार चर्चा राजकीय वर्तुळात रंगली आहे.
मिळालेल्या माहितीनुसार, गोकुळ गीते हे विशेष विमानाने मुंबईकडे रवाना होणार असून मुख्यमंत्री एकनाथ शिंदे यांची भेट घेण्याची शक्यता आहे. त्यांच्या शिवसेना प्रवेशाबाबत अधिकृत घोषणा अद्याप झालेली नसली, तरी राजकीय सूत्रांकडून या हालचालींना दुजोरा दिला जात आहे.
दरम्यान, एका समर्थकाने माध्यमांशी बोलताना गोकुळ गीते यांच्या शिवसेना प्रवेशाबाबत विश्वास व्यक्त केला. "गोकुळ गीते आमच्यासोबत येत आहेत, ही आमच्यासाठी आनंदाची बाब आहे. मात्र प्रवेशाची नेमकी वेळ अद्याप निश्चित झालेली नाही," असे त्यांनी सांगितले.
नाशिक विधानपरिषद निवडणुकीत महायुतीचे उमेदवार अजित दराडे यांच्या पराभवानंतर निर्माण झालेल्या राजकीय घडामोडींना या संभाव्य प्रवेशामुळे आणखी वेग आला आहे.
दराडे यांच्या पराभवाबाबत विचारण्यात आले असता, "पराभवानंतर इतरांवर आरोप करण्यापेक्षा आत्मपरीक्षण करणे अधिक महत्त्वाचे असते," अशी प्रतिक्रिया देण्यात आली.
गोकुळ गीते यांच्या संभाव्य शिवसेना प्रवेशाबाबत अद्याप पक्षाकडून अधिकृत घोषणा करण्यात आलेली नाही. त्यामुळे पुढील काही तासांत होणाऱ्या घडामोडींवर राज्याच्या राजकीय वर्तुळाचे लक्ष लागले आहे.
0 टिप्पण्या