मुंबई, दि. ३ जून : इयत्ता अकरावी (शैक्षणिक वर्ष 2025-26) ऑनलाईन प्रवेश प्रक्रियेतील नोंदणीसाठी विद्यार्थ्यांना दिली गेलेली मुदत आता ५ जून २०२५ रोजी दुपारी २ वाजेपर्यंत वाढवण्यात आली आहे. शालेय शिक्षण विभागाकडून देण्यात आलेल्या माहितीनुसार, महाविद्यालयीन इन-हाऊस कोट्याशी संबंधित तांत्रिक सुधारणा आणि शासनाच्या सुधारित निर्णयामुळे ही मुदतवाढ देण्यात आली आहे.
प्रारंभी, ११ वीच्या प्रवेशासाठी २६ मे ते ३ जून २०२५ हा कालावधी ठरवण्यात आला होता. मात्र, ६ मे रोजीच्या शासन निर्णयात काही तरतुदींमध्ये सुधारणा करण्यात आल्याने आणि ३१ मे २०२५ रोजीच्या शासन आदेशामुळे विद्यार्थ्यांना अधिक संधी देण्यासाठी नोंदणीची अंतिम तारीख ५ जूनपर्यंत वाढवण्यात आली आहे, अशी माहिती प्राचार्य शिक्षण संचालक (माध्यमिक) डॉ. श्रीराम पानझाडे यांनी दिली.
विद्यार्थी व पालकांनी या मुदतीचा लाभ घेऊन ११ वी प्रवेशासाठी लागणारी ऑनलाईन नोंदणी www.11thadmission.org.in या संकेतस्थळावर पूर्ण करावी, असे आवाहन शिक्षण विभागाने केले आहे.
नीट परीक्षा पुढे ढकलली
दुसऱ्या बाजूला, वैद्यकीय अभ्यासक्रमांच्या प्रवेशासाठी घेण्यात येणारी नीट (NEET) परीक्षा आता पुढे ढकलण्यात आली आहे. नॅशनल बोर्ड ऑफ एक्झामिनेशन इन मेडिकल सायन्सेस (NBEMS) ने २ जून रोजी ही घोषणा केली.
सर्वोच्च न्यायालयाच्या निर्देशानुसार नीट परीक्षा आता एकाच शिफ्टमध्ये घेण्याचे आदेश देण्यात आले होते. याआधी १५ जून २०२५ रोजी दोन शिफ्टमध्ये परीक्षा घेण्याची योजना होती. परंतु दोन शिफ्टमध्ये परीक्षा घेतल्यास गुणवत्तेचा समतोल बिघडू शकतो, अशी न्यायालयीन भूमिका होती.
त्यामुळे, NBEMS ने नीट परीक्षा "अनिश्चित काळासाठी पुढे ढकलली" असून लवकरच नव्या तारखेची घोषणा केली जाईल, असे स्पष्ट केले आहे.
NEET परीक्षेची तयारी करणाऱ्या लाखो विद्यार्थ्यांसाठी ही मोठी माहिती असून त्यांना आता अधिक तयारीसाठी वेळ मिळणार आहे. तरीही परीक्षेची नवी तारीख निश्चित होईपर्यंत विद्यार्थ्यांनी अधिकृत संकेतस्थळ आणि NBEMS च्या सूचना काळजीपूर्वक पाहाव्यात, असा सल्ला शिक्षणतज्ज्ञांनी दिला आहे.
.png)
.png)
0 टिप्पण्या