📌 Ayodhya Ram Mandir : राम मंदिराच्या कळसावर सोन्याची झळाळी; ५ जूनला राम दरबाराची प्राणप्रतिष्ठा

सोन्याने मढवलेले राम मंदिराचे शिखर!

अयोध्या - अयोध्येतील श्रीराम मंदिराच्या शिखरावर सोन्याचा झळाळता कलश स्थापन करण्यात आला असून मंदिर परिसर पुन्हा एकदा अध्यात्मिक तेजाने उजळून निघाला आहे. ५ जून रोजी सकाळी ११ वाजता राम दरबाराची प्राणप्रतिष्ठा होणार आहे, आणि त्यासाठी ३ जूनपासून विधींची तयारी सुरु झाली आहे.

राम दरबारासह सात मंदिरांची प्राणप्रतिष्ठा

या दिवशी मंदिरात केवळ प्रभु श्रीराम नव्हे, तर संपूर्ण राम दरबार – सीता, लक्ष्मण, भरत, हनुमान यांच्यासह – सिंहासनावर विराजमान होणार आहेत. याशिवाय कंपाउंडमधील ६ मंदिरांमध्ये भगवान सूर्य, गणेश, हनुमान, शिव, माता भगवती आणि माता अन्नपूर्णा यांच्या मूर्तींचीही प्राणप्रतिष्ठा होणार आहे.

प्रमुख पाहुणे आणि धार्मिक शिष्टमंडळ

या भव्य कार्यक्रमात अयोध्या आणि काशीमधील १०१ विद्वान सहभागी होणार असून, मुख्यमंत्री योगी आदित्यनाथ यांना प्रमुख पाहुणे म्हणून आमंत्रित करण्यात आले आहे. ३ आणि ४ जून रोजी मंदिरात विशेष प्रार्थना होणार असून ५ जून रोजी सकाळी ५.३० वाजता विधीला सुरुवात होईल.

शिल्पकलेचा अद्वितीय नमुना

राम दरबाराच्या मूर्ती या मकराना येथील पांढऱ्या संगमरवरापासून तयार करण्यात आल्या असून, यामध्ये भगवान श्रीराम व सीता सिंहासनावर विराजमान आहेत, तर भरत आणि हनुमान त्यांच्या पायाजवळ बसले आहेत. ही मूर्ती जयपूर येथील नारायण पांडे, गोविंद, केशव आणि अन्य शिल्पकारांनी साकारली आहे.

सप्त मंडपातील महापुरुष

या समारंभात महर्षी वाल्मिकी, विश्वामित्र, अगस्त्य, वशिष्ठ, निषादराज, अहिल्या आणि शबरी यांच्या प्रतिमाही सप्त मंडपात स्थापित केल्या जाणार आहेत. ह्या मूर्तींमुळे रामायणातील प्रमुख प्रसंगांचा अध्यात्मिक संदर्भही जीवंत केला जाणार आहे.

महिलांची जल कलश यात्रा

२ जून रोजी महिलांकडून शरयू नदीतून जल कलश यात्रा काढण्यात आली, ज्याचा समावेश धार्मिक विधींचा एक भाग आहे. संपूर्ण कार्यक्रमात रात्री ९ वाजेपर्यंत प्रार्थना सुरू राहणार आहेत.

अयोध्येतील राम मंदिराचा शिखर सोन्याने मढवलेला कळस, आणि त्यात होणारी राम दरबाराची प्राणप्रतिष्ठा – हा क्षण केवळ धार्मिक नाही, तर सांस्कृतिक आणि ऐतिहासिकदृष्ट्याही एक मैलाचा दगड ठरणार आहे. ५ जूनचा दिवस अयोध्यासाठी आणि संपूर्ण भारतासाठी दिव्य स्मरणात राहणारा आहे.