Jalgaon Accident जळगाव अपघातात दोन सख्या भावांचा मृत्यू; शिंदे गटात शोककळा

जळगाव न्यूज | प्रतिनिधी -  जळगाव शहराजवळील निमखेडी शिवारात बुधवार, ५ जून रोजी पहाटेच्या सुमारास एका भीषण अपघातात दोन सख्या भावांचा जागीच मृत्यू झाला. या दुर्दैवी घटनेने संपूर्ण शहरात हळहळ व्यक्त केली जात असून, शिवसेना शिंदे गटातील कार्यकर्त्यांमध्येही शोककळा पसरली आहे.

मृत भावांची नावे ज्ञानेश्वर झगडू शिवदे (वय ५२) आणि प्रमोद दगडू शिवदे (वय ४८) अशी आहेत. ज्ञानेश्वर शिवदे हे शिवसेना (शिंदे गट) महिला शहर प्रमुख ज्योती शिवदे यांचे पती होते, तर प्रमोद हे त्यांच्या दीर होते. दोघेही पाणीपुरी विक्रीचा व्यवसाय करीत होते. दररोजप्रमाणे ते आज पहाटे शिवाजीनगर येथील जुन्या घरी माल तयार करण्यासाठी निघाले होते.

दरम्यान, निमखेडी येथील कांताई नेत्रालयाजवळ त्यांच्या रिक्षाला एका अज्ञात वाहनाने जोरदार धडक दिली. या धडकेत रिक्षाचे मोठे नुकसान झाले आणि दोघेही गंभीर जखमी झाले. दुर्दैवाने, उपचारापूर्वीच त्यांचा जागीच मृत्यू झाला.

अपघातानंतर परिसरात मोठी गर्दी जमली होती. घटनास्थळी पोलिसांनी धाव घेत पंचनामा केला. दोघांचेही मृतदेह जिल्हा शासकीय रुग्णालयात उत्तरिय तपासणीसाठी पाठवण्यात आले. रुग्णालयात शिवसेना शिंदे गटाचे पदाधिकारी, कार्यकर्ते आणि नातेवाईकांनी मोठी गर्दी केली होती. या घटनेने शिवदे कुटुंबावर दु:खाचा डोंगर कोसळला आहे.

या अपघातामुळे केवळ एक कुटुंबच नव्हे, तर एक सामाजिक व राजकीय वर्तुळ हादरून गेले आहे. स्थानिक नागरिक आणि राजकीय सहकाऱ्यांनी श्रद्धांजली अर्पण करत दुःख व्यक्त केले.

दरम्यान, अज्ञात वाहन चालक घटनास्थळावरून फरार झाला असून, पोलिसांनी अज्ञात वाहनाविरुद्ध गुन्हा दाखल करत तपास सुरू केला आहे. परिसरातील सीसीटीव्ही फुटेज तपासले जात असून, लवकरच वाहन आणि चालकाचा तपशील समोर येण्याची शक्यता आहे.

हा अपघात केवळ एक अपघात राहिलेला नाही, तर संपूर्ण शहराने दोन मेहनती व्यक्तींना गमावले आहे. त्यांच्या कुटुंबीयांच्या या दु:खद प्रसंगात संपूर्ण जळगावकर समाज सहभागी आहे.