यावल आणि भुसावळ तालुक्यातील शिवसेना (उद्धव बाळासाहेब ठाकरे) गटातील अनेक कार्यकर्ते व पदाधिकाऱ्यांनी नुकताच शिवसेना (शिंदे गट) मध्ये प्रवेश केला आहे. मुंबईत उपमुख्यमंत्री एकनाथ शिंदे यांच्या उपस्थितीत हा पक्षप्रवेश पार पडला. या प्रवेशामुळे आगामी स्थानिक स्वराज्य संस्थांच्या निवडणुकांमध्ये शिंदे गटाला बळकटी मिळण्याची शक्यता वर्तवली जात आहे.
 |
यावल शहरातील ज्येष्ठ कार्यकर्ते विलास मोरे, सुभाष चौधरी, स्वप्निल बोरसे, नितीन देशमुख, राम शेटे, सुजित जगदाळे आदी कार्यकर्ते यावेळी शिंदे गटात दाखल झाले. यावेळी जिल्हा प्रमुख समाधान पाटील, तालुका प्रमुख राजू काठोके, यावल शहर प्रमुख पंकज बारी, तसेच भुसावळ विधानसभा प्रमुख संतोष माळी यांची उपस्थिती होती. यामुळे या भागातील राजकीय समीकरणात मोठा बदल होण्याची चिन्हं आहेत.
शिंदे गटाने स्थानिक पातळीवरील ताकद वाढवण्यासाठी मोठ्या प्रमाणावर ठाकरे गटातील नाराज कार्यकर्त्यांना आकर्षित करण्याचे प्रयत्न सुरू केल्याचे दिसून येत आहे. येणाऱ्या नगरपालिका, नगरपंचायत व जिल्हा परिषदेच्या निवडणुकांमध्ये विजय मिळवण्यासाठी हे प्रयत्न निर्णायक ठरू शकतात.
या घडामोडींमुळे ठाकरे गटात चिंतेचे वातावरण निर्माण झाले असून, गटबाजी व नेतृत्वाच्या अभावामुळे कार्यकर्त्यांमध्ये असंतोष असल्याचे दिसत आहे. शिंदे गटाकडून आगामी काळात अजून काही मोठे चेहरे सामील होण्याची शक्यता वर्तवली जात आहे.
.png)
0 टिप्पण्या