NCP JALGAON NEWS : जळगावात शरद पवारांना मोठा धक्का, दोन ज्येष्ठ नेते अजित पवार गटात प्रवेशाच्या तयारीत

JALGAON NEWS : जळगाव : राष्ट्रवादी काँग्रेसचे ज्येष्ठ नेते शरद पवार यांना जळगाव जिल्ह्यातून पुन्हा एकदा मोठा धक्का बसण्याची शक्यता आहे. जिल्ह्यातील दोन माजी मंत्री आणि मातब्बर नेते डॉ. सतीश पाटील आणि गुलाबराव देवकर हे लवकरच अजित पवार यांच्या नेतृत्वाखालील राष्ट्रवादी काँग्रेस पक्षात प्रवेश करणार असल्याचे समजते. या दोघांच्या सोबत स्थानिक कार्यकर्त्यांचाही मोठा गट अजित पवार गटात सामील होण्याची शक्यता व्यक्त होत आहे.

हा पक्षप्रवेश पुढील महिन्याच्या पहिल्या आठवड्यात मुंबईत अजित पवार यांच्या उपस्थितीत होणार आहे. या घडामोडींमुळे जळगाव जिल्ह्याचे राजकारण ढवळून निघण्याची चिन्हं आहेत. 2024 च्या लोकसभा आणि विधानसभा निवडणुकीत शरद पवार यांच्या पक्षाला जिल्ह्यात अपयशाला सामोरे जावे लागले होते. त्यामुळे कार्यकर्त्यांमध्ये असंतोष आणि नैराश्याचं वातावरण आहे.

स्थानिक स्वराज्य संस्थांच्या निवडणुका जवळ येत असताना अशा प्रकारचे पक्षांतर शरद पवार यांच्या गटासाठी मोठा धक्का ठरू शकतो. काही दिवसांपूर्वी डॉ. सतीश पाटील यांनी पक्ष सोडण्याचे सूतोवाच करताना, "विरोधी बाकावर बसताना कार्यकर्त्यांच्या समस्या सुटत नाहीत," असे वक्तव्य केले होते. त्यामुळे त्यांच्या संभाव्य पक्षांतराच्या चर्चेला जोर मिळाला होता.